Aen Fap Henhoh Duzdoengh Cunghvaz Yinzminz Gunghozgoz
（1988 nienz 11 nyied 8 hauh Gaiq Daihcaet Daengx Guek Yinzminz Daibyauj Daihhoih Cangzvu Veijyenzvei Baez Hoih Daihseiq doenggvaq
Ciuq 2004 nienz 8 nyied 28 hauh Gaiq Daihcib Daengx Guek Yinzminz Daibyauj Daihhoih Cangzvu Veijyenzvei Baez Hoih Cib’it 《Aen Gietdingh Gvendaengz Coihgaij 〈Aen Fap Henhoh Duzdoengh Cunghvaz Yinzminz Gunghozgoz〉》 baez daih’it coihcingq
Ciuq 2009 nienz 8 nyied 27 hauh Gaiq Cib’it Daengx Guek Yinzminz Daibyauj Daihhoih Cangzvu Veijyenzvei Baez Hoih Daihcib 《Aen Gietdingh Gvendaengz Coihgaij Bouhfaenh Faplwd》 baez daihngeih coihcingq
2016 nienz 7 nyied 2 hauh Gaiq Cibngeih Daengx Guek Yinzminz Daibyauj Daihhoih Cangzvu Veijyenzvei Baez Hoih Ngeihcib It coihdingh
《Aen Gietdingh Gvendaengz Coihgaij Doengh《Aen Fap Henhoh Duzdoengh Cunghvaz Yinzminz Gunghozgoz》Cibhaj Aen Faplwd》 Ciuq 2018 nienz 10 nyied 26 hauh Gaiq Cibsam Daengx Guek Yinzminz Daibyauj Daihhoih Cangzvu Veijyenzvei Baez Hoih Daihroek baez daihsam coihcingq）
Moegloeg
Cieng Daih’it Cungjcwz
Cieng Daihngeih Baujhoh Duzdoengh Nem Diegyouq De
Cieng Daihsam Guenjleix Duzdoengh
Cieng Daihseiq Faplwd Cwzyin
Cieng Daihhaj Bengxgya
Cieng Daih’it Cungjcwz
Diuz daih’it Vihliux baujhoh duzdoengh， gouqmingh gij duzdoengh dijbauj、 yaek raeg， henhoh gijduz lai yiengh caeuq bobaq doxdaengh， doicaenh cauhlaeb swnghdai vwnzmingz， dingh aen fap neix.
Diuz daihngeih Youq giz diegnamh nem dieghaij Cunghvaz Yinzminz Gunghozgoz guenjhanh， guh gij saeh baujhoh duzdoengh nem gij saeh nangqdaengz de， habyungh aen fap neix.
Gij duzdoengh aen fap neix gvidingh yaek guh baujhoh， dwg gangj gij duzdoengh dijbauj、 yaek raeg youq gwnz dieghawq、 ndaw raemx caeuq duzdoengh youq gwnz dieghawq miz swnghdai、 gohyoz、 sevei gyaciz youqgaenj.
Duzdoengh nem gij doxgaiq aeu de guh ndaw aen fap neix gvidingh， dwg gangj daengxduz （baudaengz gyaeq de）、 saek mbangj duzdoengh nem gijduz de sanjbienq baenz.
Baujhoh gij duzdoengh ndaw raemx mbouj dwg gij duzdoengh ndaw raemx dijbauj、 yaek raeg， habyungh gij gvidingh ndaw faplwd doengh 《Aen Fap Hangzdwkbya Cunghvaz Yinzminz Gunghozgoz》 neix.
Diuz daihsam Gij swhyenz duzdoengh gvi guekgya ciemqmiz.
Guekgya baujndei gij gienzik habfap aen cujciz caeuq gagboux ciuqfap guh gij yiengh hong gohyoz yenzgiu、 vunzguh sanjfat bae baujhoh nem saehnangq baujhoh duzdoengh.
Diuz daihseiq Guekgya doiq duzdoengh hengzguh gij yenzcwz baujhoh baiz youq gonq、 gveihfan bae yungh、 yiemzgek gamguenj， coihaenh mbeguh gohyoz yenzgiu duzdoengh， gungganq gyoengq gunghminz roxnyinh baujhoh duzdoengh， coicaenh vunz caeuq diendeih huzndei fazcanj.
Diuz daihhaj Guekgya baujhoh duzdoengh caeuq diegyouq duzdoengh. Yinzminz cwngfuj yienh gaep doxhwnj wngdang dinghguh gij gveihva caeuq guhfap nangqdaengz baujhoh duzdoengh nem diegyouq duzdoengh， caemhcaiq dawz cienzyungh baujhoh duzdoengh nabhaeuj yawhsuenq.
Guekgya coihaenh gunghminz、 fazyinz caeuq gij cujciz wnq ciuqfap doenggvaq guh gij saeh gienlok、 bangcienz、 gagnyienh fugsaeh bae caeuqfaenh guh saeh baujhoh duzdoengh， haeujcoengh gij saehnieb vunzlai baujhoh duzdoengh.
Giz diegyouq duzdoengh aen fap neix gvidingh， dwg gangj giz ranghdieg youqgaenj duzdoengh baenzgyoengq ndaw bobaq senglix fatlai haenx.
Diuz daihroek Mboujlwnh aen cujciz lawz caeuq boux vunz lawz cungj miz yivu baujhoh duzdoengh caeuq diegyouq de. Gimqhaed famhfap bae dwk duzdoengh、 buqvaih diegyouq duzdoengh.
Mboujlwnh aen cujciz lawz caeuq boux vunz lawz cungj miz gienz bae bouhmonz caeuq gihgvanh bauqnaeuz roxnaeuz gauqnaeuz yiengh saeh famh aen fap neix. Aen bouhmonz cawjguenj baujhoh duzdoengh caeuq gij bouhmonz、 gihgvanh wnq guenj daengz saeh bauqnaeuz roxnaeuz gauqnaeuz， wngdang gibseiz ciuqfap cawqleix.
Diuz daihcaet Aen bouhmonz cawjguenj linzyez diegnywj、 yizyez ndaw Gozvuyen faenbied cawjguenj yiengh hong baujhoh duzdoengh gwnz dieghawq、 ndaw raemx daengx guek.
Aen bouhmonz cawjguenj linzyez diegnywj、 yizyez ndaw deihfueng yinzminz cwngfuj yienh gaep doxhwnj faenbied cawjguenj yiengh hong baujhoh duzdoengh gwnz dieghawq、 ndaw raemx ndaw dieg hingzcwng bonjfaenh.
Diuz daihbet Gak gaep yinzminz cwngfuj wngdang lai roengzrengz guh yiengh hong senhconz gyauyuz caeuq mbedoh gohyoz cihsiz baujhoh duzdoengh， gikcoi caeuq haeujcoengh gij cujciz vunzlai gaeplaj gagguenj、 cujciz ndawbiengz、 giyez swyez danhvei、 bouxgagnyienh senhconz gij faplwd fapgvi caeuq cihsiz baujhoh duzdoengh.
Aen bouhmonz guenj gyauyuz、 yozyau wngdang son’gyauq hagseng gij cihsiz baujhoh duzdoengh.
Sinhvwnz meizdij wngdang mbeguh senhconz faplwd fapgvi caeuq cihsiz baujhoh duzdoengh，aeu yizlun bae gamduk saeh famhfap.
Diuz daihgouj Doiq aen cujciz caeuq boux vunz youq gohyoz yenzgiu caeuq baujhoh duzdoengh fuengmienh miz goenglauz， youz yinzminz cwngfuj yienh gaep doxhwnj bae dajciengj.
Cieng Daihngeih Baujhoh Duzdoengh Nem Diegyouq De
Diuz daihcib Guekgya doiq duzdoengh saedhengz faen loih faen gaep baujhoh.
Guekgya doiq gij duzdoengh dijbauj、 yaek raeg hengzguh cungdenj baujhoh. Gij duzdoengh guekgya cungdenj baujhoh faen baenz duzdoengh it gaep baujhoh caeuq duzdoengh ngeih gaep baujhoh. Aen bouhraizgeiq duzdoengh guekgya cungdenj baujhoh， youz aen bouhmonz cawjguenj baujhoh duzdoengh ndaw Gozvuyen bae cujciz gohyoz bingzguj le dingh roengzdaeuj， caemhcaiq moix haj bi ciuq bingzguj cingzgvang doekdingh diuzcingj aen bouhraizgeiq. Aen bouhraizgeiq duzdoengh guekgya cungdenj baujhoh bauq Gozvuyen baecinj goengbouh.
Gij duzdoengh deihfueng cungdenj baujhoh， dwg gangj gij duzdoengh mbouj dwg guekgya cungdenj baujhoh， duzdoengh youz swngj、 swcigih、 cizyazsi cungdenj baujhoh. Aen bouhraizgeiq duzdoengh deihfueng cungdenj baujhoh， youz swngj、 swcigih、 cizyazsi yinzminz cwngfuj cujciz gohyoz bingzguj le bae doekdingh、 diuzcingj caemhcaiq goengbouh.
Aen bouhraizgeiq duzdoengh gwnz dieghawq miz swnghdai、 gohyoz、 sevei gyaciz youqgaenj， youz aen bouhmonz cawjguenj baujhoh duzdoengh ndaw Gozvuyen bae cujciz gohyoz bingzguj le doekdingh、 diuzcingj、 caemhcaiq goengbouh.
Diuz cib’it Aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj， wngdang dinghseiz cujciz roxnaeuz dak hawj gohyoz yenzgiu gihgou bae diucaz、 gamcaek caeuq bingzguj gij canggvang duzdoengh nem diegyouq de， laebhwnj laebcienz gij dang’an duzdoengh nem diegyouq de.
Diucaz、 gamcaek caeuq bingzguj gij canggvang duzdoengh nem diegyouq de wngdang baudaengz gij neiyungz lajneix：
（It） Duzdoengh faenbouh youq rangh dieg bobaq lawz、 baenz geijlai bang nem baenzlawz doxgap；
（Ngeih） Gij diegyouq duzdoengh geijlai gvangq、 seiqhenz diegyouq baenzlawz yiengh；
（Sam） Duzdoengh nem diegyouq de miz yiengh maz bikmwg；
（Seiq） Gij neiyungz wnq beijlumj duzdoengh vunzguh sanjfat aeu diucaz、 gamcaek caeuq bingzguj yiengh lawz.
Diuz cibngeih Aen bouhmonz cawjguenj baujhoh duzdoengh ndaw Gozvuyen, wngdang caeuq gij bouhmonz nangqdaengz saeh baujhoh duzdoengh ndaw Gozvuyen caezcaemh，ciuq gij saeh diucaz、 gamcaek caeuq bingzguj duzdoengh nem diegyouq de aeundaej，doekdingh caemhcaiq fatbouh aen bouhraizgeiq giz diegyouq youqgaenj duzdoengh.
Yinzminz cwngfuj swngj gaep doxhwnj ciuqfap vehdingh gvaeg diendeih baujhoh duzdoengh yunghdaengz， baujhoh duzdoengh nem diegyouq de， baujhoh、 dauqfuk caeuq gaijndei seiqhenz diegyouq ciengxmingh duzdoengh. Doiq giz mbouj miz diuzgen vehdingh gvaeg diendeih baujhoh duzdoengh yunghdaengz， yinzminz cwngfuj yienh gaep doxhwnj ndaej yungh yienghsik wnq baudaengz vehdingh dieg gimq dwknyaen（dwkbya）、 gvidingh mboengq gimq dwknyaen（dwkbya）bae baujhoh.
Gimqhaed roxnaeuz hanhhaed youq ndaw gvaeg diendeih baujhoh duzdoengh yunghdaengz, guh gij saeh yinxhaeuj yienghduz baihrog、 cauh aenndoeng miz yiengh faex dog、 byoq ywnon mauhliengh， gauxca、 hangzhaep duzdoengh senglix sanjfat.
Gvaeg diendeih baujhoh duzdoengh yunghdaengz， ciuq gij gvidingh ndaw faplwd fapgvi bae vehdingh caeuq guenjleix.
Diuz cibsam Yinzminz cwngfuj yienh gaep doxhwnj nem aen bouhmonz nangqsaeh youq mwh bienguh gij gveihva nangqdaengz haifat leihyungh， wngdang lai ngeixnaemj baenzlawz ndaej baujhoh duzdoengh nem diegyouq de， faencek、 yawhcaek caeuq bingzguj saedhengz gij gveihva neix, yaek ngaih mbouj ngaih daengxbuenz baujhoh duzdoengh nem diegyouq de， ceiqndei mbouj miz roxnaeuz gemjnoix gij saeh mbouj ndei mwh saedhengz gveihva cauxbaenz.
Gimqhaed youq ndaw gvaeg diendeih baujhoh duzdoengh yunghdaengz, hwnqguh gij hanghmoeg faplwd fapgvi gvidingh mbouj cinj hwnqguh haenx. Genj dieg genj loh hwnqguh gij gihcangz、 dietloh、 goengloh、 suijli suijden、 humx fai daemq、 humx haij dienz haih， wngdang veq gvaq gvaeg diendeih baujhoh duzdoengh yunghdaengz、 roenloh hawj duzdoengh senjdieg caeuq youzraemx baedauq； danghnaeuz mbouj miz banhfap veq gvaq， wngdang yungh banhfap hwnq diuzloh hawj duzdoengh byaij gvaq、 hawj bya youz gvaq， siucawz roxnaeuz gemjnoix gij laengzgaz duzdoengh.
Danghnaeuz hwnqguh hanghmoeg yaek ngaih daengz gvaeg diendeih baujhoh duzdoengh yunghdaengz、 git roen duzdoengh senjdieg youzraemx， aen bouhmonz saemjbae vwnzgen bingzgya seiqhenz laengzgaz duzdoengh, youq mwh saemjbae gij vwnzgen neix， danghnaeuz nangqdaengz duzdoengh guekgya cungdenj baujhoh， wngdang camaeu gij yigen aen bouhmonz cawjguenj baujhoh duzdoengh ndaw Gozvuyen； nangqdaengz gij duzdoengh deihfueng cungdenj baujhoh ne， wngdang camaeu gij yigen aen bouhmonz cawjguenj baujhoh duzdoengh ndaw yinzminz cwngfuj swngj、 swcigih、 cizyazsi.
Diuz cibseiq Gak gaep bouhmonz cawjguenj baujhoh duzdoengh wngdang gamyawj、 gamcaek gij bobaq ngaih mbouj ngaih duzdoengh. Danghnaeuz bobaq ngaih duzdoengh， cauxbaenz duzdoengh sienghaih， aen bouhmonz cawjguenj baujhoh duzdoengh wngdang gapcaeuq gij bouhmonz nangqdaengz saeh baujhoh duzdoengh guh diucaz cawqleix.
Diuz cibhaj Gij duzdoengh guekgya roxnaeuz deihfueng cungdenj baujhoh, youq mwh deng gij saeh fwtfat, beijlumj diendeih caihaih、 vanzging uqlah saehhux hungnaek haephex， yinzminz cwngfuj dangdieg wngdang gibseiz yungh banhfap bae gouqhaen.
Aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj, wngdang ciuq guekgya gvidingh bae cujciz mbeguh yiengh hong soulouz gouqhoh duzdoengh.
Gimq yungh yiengh mingzdaeuz soulouz gouqhoh duzdoengh bae gaicawx duzdoengh nem gij doxgaiq duzdoengh cauhbaenz.
Diuz cibroek Aen bouhmonz cawjguenj baujhoh duzdoengh、cawjguenj canghyw doenghduz ndaw yinzminz cwngfuj yienh gaep doxhwnj， wngdang ciuq hongsaeh faenhong bae gamcaek gij binghraq nem gij goekgaen binghraq duzdoengh， cujciz mbeguh gij hong yawhcaek、 yawhbauq， caemhcaiq ciuq gvidingh bae dingh gij fuengfap bwh gouqhaen binghraq duzdoengh， bauq hawj yinzminz cwngfuj doengzgaep baecinj roxnaeuz bwh’anq.
Aen bouhmonz cawjguenj baujhoh duzdoengh、 cawjguenj canghyw doenghduz、 cawjguenj veiswngh doenghduz ndaw yinzminz cwngfuj yienh gaep doxhwnj， wngdang ciuq hongsaeh faenhong bae guh gij hong fuengzceih guenjleix yiengh binghraq ngaih daengz vunz nem doenghduz caemh fat binghraq.
Diuz cibcaet Guekgya lai roengzrengz baujhoh cungjniuh duzdoengh， ciengjgouq baujhoh gij duzdoengh yaek raeg.
Aen bouhmonz cawjguenj baujhoh duzdoengh ndaw Gozvuyen wngdang gapcaeuq gij bouhmonz nangqsaeh baujhoh duzdoengh ndaw Gozvuyen dingh gij gveihva nangqsaeh baujhoh caeuq leihyungh cungjniuh duzdoengh， laebhwnj aen cang gihyinh cungjniuh duzdoengh guekgya， saedhengz cungdenj baujhoh gij cungjniuh duzdoengh dijbauj、 yaek raeg yienzbonj canj youq guek raeuz.
Diuz cibbet Gij deihfueng yinzminz cwngfuj nangqsaeh wngdang yungh banhfap， yawhfuengz、 gaemhanh gij sienghaih aiq deng duzdoengh cauxbaenz， baujndei vunz caeuq doihduz ancienz nem nungzyez、 linzyez swnghcanj.
Diuz cibgouj Aenvih baujhoh gij duzdoengh aen fap neix gvidingh aeu baujhoh， cauxbaenz vunz deng sieng dai、 gomiuz roxnaeuz gij caizcanj wnq sonjsaet， youz yinzminz cwngfuj dangdieg dienzboiz. Yungh gijmaz banhfap youz swngj、 swcigih、 cizyazsi yinzminz cwngfuj dingh. Gij yinzminz cwngfuj deihfueng nangqsaeh ndaej coi baujyenj gihgou mbeguh hong baujyenj dienzboiz, dienzboiz gij sonjhaih deng duzdoengh cauxbaenz.
Gij yinzminz cwngfuj deihfueng nangqsaeh yungh banhfap yawhfuengz、 gaemhanh gij sienghaih duzdoengh guekgya cungdenj baujhoh cauxbaenz caeuqlienz gij cienz saedhengz dienzboiz aeuyungh， youz cunghyangh caizcwng ciuq guekgya gvidingh guh bangbouj.
Cieng Daihsam Guenjleix Duzdoengh
Diuz ngeihcib Youq ndaw gvaeg diendeih baujhoh duzdoengh yunghdaengz caeuq dieg gimq dwknyaen（dwkbya）、 mboengq gimq dwknyaen（dwkbya）， gimqhaed guh gij saeh dwkaeu nem gij saeh wnq fuengzngaih duzdoengh senglix fatlai， hoeng faplwd fapgvi lingh miz gvidingh lingh gangj.
Youq mboengq duzdoengh senjdieg caeuq youzraemx baedauq， diuzloh ndaej senjdieg caeuq youzraemx baedauq mbouj youq ndaw gvaegdieg gvanj gonq gvidingh haenx， gimqhaed dwkaeu caemhcaiq yiemz haed guh gij saeh fuengzngaih duzdoengh senglix fatlai. Aen gvaeg diuzloh senjdieg roxnaeuz youzraemx baedauq caeuq gij neiyungz yiengh hengzguh fuengzngaih duzdoengh senglix fatlai， youz yinzminz cwngfuj yienh gaep doxhwnj roxnaeuz aen bouhmonz cawjguenj baujhoh duzdoengh guh gvidingh caemhcaiq goengbouh.
Diuz ngeihcib it Gimqhaed dwkaeu、 gajdai gij duzdoengh guekgya cungdenj baujhoh.
Aenvih gohyoz yenzgiu、 gaemguenj cungjgyoengq、 gamcaek cwxbinghraq dem binghraq roxnaeuz miz yiengh saeh daegbied wnq， aeu dwk gij duzdoengh guekgya it gaep baujhoh ne， wngdang bae aen bouhmonz cawjguenj baujhoh duzdoengh ndaw Gozvuyen sinhcingj mbawcingq daegbied cinjhawj dwkaeu；aeu dwk gij duzdoengh guekgya ngeih gaep baujhoh ne， wngdang bae aen bouhmonz cawjguenj baujhoh duzdoengh ndaw yinzminz cwngfuj swngj、 swcigih、 cizyazsi sinhcingj mbawcingq daegbied cinjhawj dwkaeu.
Diuz ngeihcib ngeih Dwkaeu gij duzdoengh mbouj dwg guekgya cungdenj baujhoh， wngdang ciuqfap aeundaej mbawcingq dwknyaen youz aen bouhmonz cawjguenj baujhoh duzdoengh ndaw yinzminz cwngfuj deihfueng yienh gaep doxhwnj haedcinj fathawj， caemhcaiq eiq gij soqliengh hanh hawj dwkaeu neix guenjleix.
Diuz ngeihcib sam Boux bae dwkaeu wngdang ciuq gij cungjloih、 soqliengh、 gizdieg、 gaiqdawz、 fuengfap caeuq seizhanh mbawcingq daegbied cinjhawj dwkaeu、 mbawcingq dwknyaen gvidingh bae dwkaeu.
Dawz cungq dwkaeu ne， wngdang ciuqfap aeundaej mbawcingq dawz cungq gungh’anh gihgvanh haedcinj fathawj.
Diuz ngeihcib seiq Gimq yungh ywdoeg、 doxgaiq bauqcaq、 aeu dienh dwk roxnaeuz aeu gaiqdawz denswj yaeuh gaeb caeuqlienz yungh gij gaiqdawz gabdawz、 napdawz、 cungqdeih、 cungqbaiz bae dwkaeu， gimq yungh gij fuengfap gyanghaemh ciuqrongh dwknyaen、 gvaeghumx aeuraeg、 dwk vaih aenrongz、 feiz coemh、 ien roemz、 muengx gaeb bae dwkaeu， hoeng aenvih gohyoz yenzgiu hab aeu muengx gaeb、 denswj yaeuh gaeb lingh gangj.
Gij gaiqdawz caeuq fuengfap dwknyaen gimq yungh mbouj dwg gvanj gonq gvidingh haenx， youz yinzminz cwngfuj deihfueng yienh gaep doxhwnj gvidingh caemhcaiq goengbouh.
Diuz ngeihcib haj Guekgya haeujcoengh gij gihgou vih baujhoh niuhdoenghduz cix guh gohyoz yenzgiu vunzguh sanjfat gij duzdoengh guekgya cungdenj baujhoh.
Vunzguh sanjfat gij duzdoengh guekgya cungdenj baujhoh mbouj dwg gvanj gonq gvidingh, saedhengz hangh cidu cinjhawj. Vunzguh sanjfat gij duzdoengh guekgya cungdenj baujhoh， wngdang ndaej aen bouhmonz cawjguenj baujhoh duzdoengh yinzminz cwngfuj swngj、 swcigih、 cizyazsi baecinj gvaq， aeundaej mbawcingq cinjhawj vunzguh sanjfat， hoeng danghnaeuz Gozvuyen doiq baecinj gihgvanh lingh miz gvidingh cix lingh gangj.
Gij duzdoengh vunzguh sanjfat guekgya cungdenj baujhoh wngdang yungh cungjniuh daih lwg vunzguh sanjfat， laebhwnj aen hidungj raizgeiq cungjloih caeuq laiciuh、 sanjfat dangjan caeuq gagduz soqgawq niuhdoenghduz. Vih guhdaengz baujhoh niuhdoenghduz caen aeuyungh gij cungjniuh bobaq ne， habyungh gij gvidingh aen fap neix diuz ngeihcib it caeuq diuz ngeihcib sam.
Gij vunzguh sanjfat ciuhlwg aen fap neix gangj， dwg gangj gij ciuhlwg vih vunzguh gaemhanh sanjfat okseng caemhcaiq duzboh duzmeh de hix dwg vih vunzguh gaemhanh okseng.
Diuz ngeihcib roek Vunzguh sanjfat gij duzdoengh guekgya cungdenj baujhoh wngdang doiq baujhoh niuhdoenghduz nem gohyoz yenzgiu mizleih， mbouj ndaej buqvaih gij diendeih cungjgyoengq bobaq， caemhcaiq ciuq gij daegsingq duzdoengh bae baujndei giz diegdeih noix mbouj ndaej caeuq gij diuzgienh hawj de senglix fatlai、 veiswngh cangqheiq， bwh miz gij ciengzdieg、 gaiqyungh、 gisuz hab duzdoengh sanjfat muzdiz、 cungjloih、 fazcanj gveihmoz， hab gisuz biucinj caeuq ndaej fuengzraq， mbouj ndaej nyoegnyamx duzdoengh.
Aen bouhmonz cawjguenj baujhoh duzdoengh ndaw yinzminz cwngfuj swngj gaep doxhwnj ndaej ciuq gij aeuyungh baujhoh duzdoengh guekgya cungdenj baujhoh， cujciz mbeguh hangh hong dauq cuengq duzdoengh guekgya cungdenj baujhoh ok bobaq.
Diuz ngeihcib caet Gimqhaed gai、 cawx、 yungh gij duzdoengh guekgya cungdenj baujhoh nem gij doxgaiq duzdoengh cauhbaenz.
Aenvih gohyoz yenzgiu、 vunzguh sanjfat、 langhbaij caeuq yienjheiq hawj vunzlai yawj、 vwnzvuz baujhoh roxnaeuz yiengh saeh daegbied wnq， yaek gai、 cawx、yungh gij duzdoengh guekgya cungdenj baujhoh nem gij doxgaiq duzdoengh cauhbaenz， wngdang ndaej aen bouhmonz cawjguenj baujhoh duzdoengh ndaw yinzminz cwngfuj swngj、 swcigih、 cizyazsi baecinj gvaq， caemhcaiq ciuq gvidingh aeundaej caeuq cinjyungh aen maihauh cienmonz yungh，baujcwng ndaej gyaepcaz goekgaen，hoeng danghnaeuz Gozvuyen doiq baecinj gihgvanh lingh miz gvidingh cix lingh gangj.
Gij soqliengh lainoix caeuq gij banhfap guenjleix cungj maihauh cienmonz yungh youq duzdoengh guekgya cungdenj baujhoh nem gij doxgaiq duzdoengh cauhbaenz， youz aen bouhmonz cawjguenj baujhoh duzdoengh ndaw Gozvuyen daeuj gvidingh.
Gai、 yungh gij duzdoengh mbouj dwg guekgya cungdenj baujhoh ne， wngdang dawzok gij cwngmingz laizloh habfap dwknyaen、 dawz haeujok gyaiqguek.
Gai gij duzdoengh diuz neix gvanj daihngeih、 gvanj daihseiq gvidingh ne， lij wngdang ciuqfap bengxgya mbawcingq cazniemh binghlah.
Diuz ngeihcib bet Doiq gij gisuz vunzguh sanjfat duzdoengh guekgya cungdenj baujhoh cingzsug onjdingh haenx， ndaej gohyoz lwnhcingq gvaq， nabhaeuj ndaw aen bouhraizgeiq duzdoengh vunzguh sanjfat guekgya cungdenj baujhoh, aen bouhraizgeiq neix dwg aen bouhmonz cawjguenj baujhoh duzdoengh ndaw Gozvuyen ceiqdingh. Doiq gij duzdoengh nem gij doxgaiq duzdoengh cauhbaenz baizhaeuj bouhraizgeiq， ndaej baengh mbawcingq cinjhawj vunzguh sanjfat， ciuq gij soqliengh ndawbi swnghcanj youz aen bouhmonz cawjguenj baujhoh duzdoengh ndaw yinzminz cwngfuj swngj、 swcigih、 cizyazsi saemjhaed cazniemh, ciepsoh aeundaej gij maihauh cienmonz yungh， baengh gij maihauh cienmonz gai caeuq yungh， baujcwng ndaej gyaepcaz laizloh.
Youq mwh ciuq aen fap neix diuz daihcib gvidingh diuzcingj aen bouhraizgeiq duzdoengh guekgya cungdenj baujhoh， ciuq gij saeh baujhoh cungjgyoengq bobaq， ndaej doiq gij cungjgyoengq vunzguh gisuz sanjfat duzdoengh cingzsug onjdingh gvanj gonq gvidingh， mbouj caiq baizhaeuj aen bouhraizgeiq duzdoengh guekgya cungdenj baujhoh， saedhengz gij banhfap caeuq gij guenjleix cungjgyoengq bobaq mbouj doengz， hoeng wngdang ciuq gij gvidingh aen fap neix diuz ngeihcib haj gvanj daihngeih caeuq diuz neix gvanj daih’it aeundaej mbawcingq cinjhawj vunzguh sanjfat caeuq gij maihauh cienmonz yungh.
Diuz ngeihcib gouj Yungh duzdoengh nem gij doxgaiq duzdoengh cauhbaenz， wngdang aeu gyoengq doenghduz vunzguh sanjfat guhgoek， neix doiq henhoh gij cungjgyoengq bobaq mizleih， hab gij iugouz ndalaeb swnghdai vwnzmingz， gingqcungh dauhleix ndawbiengz， ciuqsouj faplwd fapgvi caeuq guekgya gvidingh.
Duzdoengh nem gij doxgaiq duzdoengh cauhbaenz danghnaeuz dangguh gijyw daeuj gai caeuq yungh， lij wngdang ciuqsouj gij faplwd fapgvi guenjleix gijyw.
Diuz samcib Gimqhaed swnghcanj、 haiguh gijgwn yungh duzdoengh guekgya cungdenj baujhoh nem gij doxgaiq duzdoengh cauhbaenz， roxnaeuz gijgwn yungh gij duzdoengh mbouj dwg guekgya cungdenj baujhoh nem gij doxgaiq duzdoengh cauhbaenz youh mbouj miz cwngmingz laizloh habfap.
Gimqhaed vihliux gwn yungh mbouj habfap cawxaeu gij duzdoengh guekgya cungdenj baujhoh nem gij doxgaiq duzdoengh cauhbaenz.
Diuz samcib it Gimqhaed vih gai、 cawx、 yungh duzdoengh roxnaeuz vih gij gaiqyungh dwknyaen deng gimqhaed bae fat gvangjgau. Gimqhaed bang fat gij gvangjgau gai、 cawx、 yungh gij doxgaiq duzdoengh cauhbaenz famhfap.
Diuz samcib ngeih Gimqhaed gij gwnzvangj guh gaicawx、 gwnzhaw guh gaicawx， vih gai、 cawx、 yungh duzdoengh nem gij doxgaiq duzdoengh cauhbaenz famhfap roxnaeuz gij gaiqdawz dwknyaen gimq yungh cix hawj giz guh gaicawx.
Diuz samcib sam Daehyinh、 raek dawz、 fakgeiq gij duzdoengh guekgya cungdenj baujhoh nem gij doxgaiq duzdoengh cauhbaenz、 gij duzdoengh nem gij doxgaiq duzdoengh cauhbaenz aen fap neix diuz ngeihcib bet gvanj daihngeih gvidingh ok rog yienh bae， wngdang dawzmiz roxnaeuz bengxgya gij fubwnj mbawcingq cinjhawj、 gij faenzgienh baecinj roxnaeuz gij maihauh cienmonz yungh ndaw aen fap neix diuz ngeihcib it、 diuz ngeihcib haj、 diuz ngeihcib caet roxnaeuz diuz ngeihcib bet gvidingh， caiqlij aeu miz mbawcingq cazniemh binghlah.
Daehyinh gij duzdoengh mbouj dwg guekgya cungdenj baujhoh ok rog yienh， wngdang dawzmiz mbawcingq laizloh habfap dwknyaen、 dawz haeujok gyaiqguek， caiqlij dawzmiz mbawcingq cazniemh binghlah.
Diuz samcib seiq Aen bouhmonz cawjguenj baujhoh duzdoengh yinzminz cwngfuj yienh gaep doxhwnj, wngdang gamduk guenjleix gij saeh yungh duzdoengh nem gij doxgaiq duzdoengh cauhbaenz guh gohyoz yenzgiu、 vunzguh sanjfat、 langhbaij caeuq yienjheiq hawj vunzlai yawj.
Aen bouhmonz wnq nangqsaeh duzdoengh ndaw yinzminz cwngfuj yienh gaep doxhwnj， wngdang ciuq hongsaeh faenhong gamduk genjcaz gij saeh gai、 cawx、 yungh、 daehyinh、 fakgeiq duzdoengh nem gij doxgaiq duzdoengh cauhbaenz.
Diuz samcib haj Aen bouhraizgeiq duzdoengh roxnaeuz gij doxgaiq duzdoengh cauhbaenz deng aen gozci gunghyoz Cunghvaz Yinzminz Gunghozgoz dinghlaeb roxnaeuz caeuqfaenh dinghlaeb gimqhaed roxnaeuz hanhhaed gaicawx， youz aen gihgou guekgya guenjleix haeujok gyaiqguek yiengh cungjniuh yaek raeg ceiqdingh、 diuzcingj caemhcaiq goengbouh.
Gij duzdoengh roxnaeuz gij doxgaiq duzdoengh cauxbaenz haeujok gyaiqguek baizhaeuj bouhraizgeiq ndaw gvanj gonq， gij duzdoengh guekgya cungdenj baujhoh roxnaeuz gij doxgaiq duzdoengh cauhbaenz dawzok gyaiqguek ne， wngdang ndaej aen bouhmonz cawjguenj baujhoh duzdoengh ndaw Gozvuyen roxnaeuz Gozvuyen baecinj gvaq， caemhcaiq aeundaej mbaw cwngmingz cinjhawj dawzok gyaiqguek, youz aen gihgou guekgya guenjleix yiengh cungjniuh yaek raeg dawzok gyaiqguek hanhhaed fathawj. Haijgvanh ciuqfap hengzguh cazniemh binghraq haeujok gyaiqguek， baengh mbaw cwngmingz cinjhawj haeujok gyaiqguek、 mbawcingq cazniemh binghraq ciuq gvidingh banhleix doenggvan soujsuz.
Gij cungjniuh duzdoengh dawzok gyaiqguek nangqdaengz baexmaed gohyoz gisuz，ciuq gij Gozvuyen gvidingh neix banhleix.
Gij duzdoengh baizhaeuj aen bouhraizgeiq diuz neix gvanj daih’it， gvaq aen bouhmonz cawjguenj baujhoh duzdoengh ndaw Gozvuyen haedcinj gvaq，gij yiengh ndaw aen fap neix habyungh, ndaej ciuq gij duzdoengh guekgya cungdenj baujhoh daeuj guenjleix.
Diuz samcib roek Guekgya cujciz mbeguh gij saeh guekguek doxgap caeuq vuenh cekeiq nem caepfap baujhoh duzdoengh；laebhwnj cungj guhfap hawj gak bouhmonz doxbang fuengzre、 dwkceih coujswh caeuq mbouj habfap gaicawx duzdoengh nem gij doxgaiq duzdoengh cauhbaenz， mbeguh gij saeh fuengzre、 dwkceih coujswh caeuq mbouj habfap gaicawx.
Diuz samcib caet Danghnaeuz daj rog gyaiqguek yinxhaeuj gij cungjniuh duzdoengh， wngdang ndaej aen bouhmonz cawjguenj baujhoh duzdoengh ndaw Gozvuyen baecinj gvaq . Daj rog gyaiqguek yinxhaeuj gij duzdoengh baizhaeuj ndaw bouhraizgeiq aen fap neix diuz samcib haj gvanj daih’it， lij wngdang ciuqfap aeundaej mbaw cwngmingz cinjhawj haeujok gyaiqguek. Haijgvanh ciuqfap hengzguh gij saeh cazniemh binghlah haeuj gyaiqguek， baengh gij faenzgienh baecinj haeuj guekgyaiq roxnaeuz mbaw cwngmingz cinjhawj haeujok gyaiqguek caeuqlienz mbaw cwngmingz cazniemh binghlah ciuq gvidingh banhleix doenggvan soujsuz.
Daj rog gyaiqguek yinxhaeuj gij cungjniuh duzdoengh， wngdang yungh gij banhfap fuengzre ancienz baenghndaej， fuengzre de haeuj daengz ndaw dieg bobaq， gaej doiq swnghdai hidungj cauxbaenz sienghaih. Danghnaeuz caencingq aeu cuengq de haeuj bobaq， ciuq gij gvidingh guekgya guenj daengz caephengz.
Diuz samcib bet Mboujlwnh aen cujciz lawz caeuq boux vunz lawz dawz duzdoengh cuengqseng daengz bobaq， wngdang genjaeu gij cungjniuh hab cuengq youq bobaq dangdieg ndaej lix haenx， mbouj ndaej gauxca gyoengqvunz dangdieg ngoenznaengz gwndaenj、 swnghcanj， gaej hawj swnghdai hidungj cauxbaenz sienghaih. Danghnaeuz seizbienh cuengqseng duzdoengh， cauhbaenz ndangvunz、 caizcanj bouxwnq sonjsaet roxnaeuz sienghaih swnghdai hidungj， ciuqfap rapdawz faplwd cwzyin.
Diuz samcib gouj Gimqhaed gyajcauh、 bienqcauh、 gaicawx、 cienjnyiengh、 cociq mbawcingq daegbied cinjhawj dwkaeu、 mbawcingq dwknyaen、 mbawcingq cinjhawj vunzguh sanjfat nem maihauh cienmonz yungh， gai、 cawx、 yungh gij faenzgienh baecinj duzdoengh guekgya cungdenj baujhoh nem gij doxgaiq duzdoengh cauhbaenz， roxnaeuz gij faenzgienh baecinj baudaengz mbaw cwngmingz cinjhawj dawzok gyaiqguek、 haeujok gyaiqguek.
Gij saeh fathawj mbawcingq cinjhawj、 maihauh cienmonz yungh、 faenzgienh baecinj nangqdaengz gvanj gonq gvidingh， wngdang ciuqfap goenghai hawj vunzlai rox.
Diuz seiqcib Vunz guekrog youq bobaq guek raeuz gaujcaz roxnaeuz gaep denyingj、 loegsiengq duzdoengh guekgya cungdenj baujhoh， wngdang ndaej aen bouhmonz cawjguenj baujhoh duzdoengh ndaw yinzminz cwngfuj swngj、 swcigih、 cizyazsi roxnaeuz aen danhvei ndaej de hawjgienz haenx baecinj gvaq， caemhcaiq ciuq gij gvidingh ndw faplwd fapgvi hengz.
Diuz seiqcib it Gij banhfap guenjleix duzdoengh deihfueng cungdenj baujhoh caeuq gij duzdoengh wnq mbouj dwg guekgya cungdenj baujhoh， youz aen yinzminz daibyauj daihhoih swngj、 swcigih、 cizyazsi roxnaeuz aen cangzvu veijyenzvei de dinghguh.
Cieng Daihseiq Faplwd Cwzyin
Diuz seiqcib ngeih Aen bouhmonz cawjguenj baujhoh duzdoengh roxnaeuz gij bouhmonz、 gihgvanh wnq nangqsaeh mbouj ciuqfap guh hingzcwng cinjhawj gietdingh， raenmiz gij saeh famhfap roxnaeuz ciepdaengz gij saehbauq famhfap mbouj cazcawq roxnaeuz mbouj ciuqfap cazcawq， roxnaeuz miz gij saeh wnq mbouj ciuqfap hengz hongsaeh baudaengz gij yiengh luenh yungh gienzhongsaeh， youz aen yinzminz cwngfuj bonjgaep roxnaeuz aen bouhmonz、 gihgvanh yinzminz cwngfuj gaepgwnz nangqsaeh de, hatheuh gaijcingq， doiq boux cawjguenj miz cwzyin caeuq gij bouxwnq ciepsoh nangq hongsaeh, ciuqfap guh cawqfaen geiq loek、 geiq loekhung roxnaeuz gyangq gaepbied；danghnaeuz cauhbaenz ok saehvaih youqgaenj， aeu cawqfaen siubae hongsaeh roxnaeuz haicawz， boux guhgoek gaemguenj hongsaeh wngdang nyinhloek gag doiqok hangzhong， gapbaenz famhcoih ne， wngdang gyaepcaz hingzsaeh cwzyin.
Diuz seiqcib sam Famh gij gvidingh aen fap neix diuz cibngeih gvanj daihsam、 diuz cibsam gvanj daihngeih，ciuq gij gvidingh ndaw faplwd fapgvi guh cawqfad.
Diuz seiqcib seiq Famh gij gvidingh aen fap neix diuz cibhaj gvanj daihsam， aeu mingzdaeuz yoce gouqhoh bae gaicawx duzdoengh nem gij doxgaiq duzdoengh cauhbaenz， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj muedsou duzdoengh nem gij doxgaiq duzdoengh cauhbaenz、 gij famhfap aeundaej， caemhcaiq fadcienz dangq gij gyaciz duzdoengh nem gij doxgaiq duzdoengh cauhbaenz song boix doxhwnj cib boix doxroengz， dawz gij coenzsaeh famhfap geiq haeuj ndaw dang’an ndawbiengz saenqsim， youq ndawbiengz goenghai hawj vunzlai rox；danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz seiqcib haj Famh gij gvidingh aen fap neix diuz ngeihcib 、 diuz ngeihcib it、 diuz ngeihcib sam 、 diuz ngeihcib seiq gvanj daih’it， youq ndaw gvaeg diendeih baujhoh duzdoengh yunghdaengz、 dieg gimq dwknyaen（dwkbya）、 mboengq gimq dwknyaen（dwkbya） dwkaeu gij duzdoengh guekgya cungdenj baujhoh， mbouj aeundaej mbawcingq daegbied cinjhawj dwkaeu、 mbouj ciuq mbawcingq daegbied cinjhawj gvidingh dwkaeu、 gajdai gij duzdoengh guekgya cungdenj baujhoh， roxnaeuz yungh gij gaiqdawz、 fuengfap gimqyungh bae dwkaeu gij duzdoengh guekgya cungdenj baujhoh， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj、 aen bouhmonz gwnz haij caepfap roxnaeuz gij gihgou guenjleix gvaegdieg baujhoh ciuq hongsaeh faenhong， muedsou gij doxgaiq dwk ndaej、 gij gaiqdawz dwkaeu caeuq gij famhfap aeundaej， diuqsiu mbawcingq daegbied cinjhawj dwkaeu， caemhcaiq fadcienz dangq gij gyaciz doxgaiq dwk ndaej song boix doxhwnj cib boix doxroengz；mbouj dwk ndaej doxgaiq ne， caemh fadcienz fanh maenz doxhwnj haj fanh maenz doxroengz；gapbaenz famhcoih ne， ciuqfap gyaepcaz hingzsaeh cwzyin.
Diuz seiqcib roek Famh gij gvidingh aen fap neix diuz ngeihcib 、 diuz ngeihcib ngeih、 diuz ngeihcib sam、 diuz ngeihcib seiq gvanj daih’it， youq ndaw gvaeg diendeih baujhoh duzdoengh yunghdaengz、 dieg gimq dwknyaen（dwkbya）、 mboengq gimq dwknyaen（dwkbya） dwkaeu gij duzdoengh mbouj dwg guekgya cungdenj baujhoh， mbouj aeundaej mbawcingq dwknyaen、 mbouj ciuq gij gvidingh mbawcingq dwknyaen bae dwkaeu gij duzdoengh mbouj dwg guekgya cungdenj baujhoh， roxnaeuz yungh gij gaiqdawz、 fuengfap gimqyungh bae dwkaeu gij duzdoengh mbouj dwg guekgya cungdenj baujhoh， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj, roxnaeuz gij gihgou nangqsaeh guenjleix gvaegdieg baujhoh, ciuq faenhhong faenhong muedsou gij doxgaiq dwk ndaej、 gij gaiqdawz dwkaeu caeuq gij famhfap aeundaej， diuqsiu mbawcingq dwknyaen， caemhcaiq fadcienz dangq gij gyaciz doxgaiq dwk ndaej boix ndeu doxhwnj haj boix doxroengz；mbouj dwk ndaej doxgaiq ne， caemh fadcienz song cien maenz doxhwnj fanh maenz doxroengz；danghnaeuz gapbaenz famhcoih， ciuqfap gyaepcaz hingzsaeh cwzyin.
Famh gij gvidingh aen fap neix diuz ngeihcib sam gvanj daihngeih， mbouj aeundaej mbawcingq dawzcungq cix dawzcungq dwkaeu duzdoengh， gapbaenz gij saeh famh cianh guenjleix ne， youz gungh’anh gihgvanh ciuqfap guh cianh guenjleix cawqfad；danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz seiqcib caet Famh gij gvidingh aen fap neix diuz ngeihcib haj gvanj daihngeih， mbouj aeundaej mbawcingq cinjhawj vunzguh sanjfat couh bae sanjfat gij duzdoengh guekgya cungdenj baujhoh roxnaeuz gij duzdoengh aen fap neix diuz ngeihcib bet gvanj daihngeih gvidingh haenx， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj muedsou duzdoengh nem gij doxgaiq duzdoengh cauhbaenz， caemhcaiq fadcienz dangq gij gyaqcienz duzdoengh nem gij doxgaiq duzdoengh cauhbaenz boix ndeu doxhwnj haj boix doxroengz.
Diuz seiqcib bet Famh gij gvidingh aen fap neix diuz ngeihcib caet gvanj daih’it caeuq gvanj daihngeih、 diuz ngeihcib bet gvanj daih’it、 diuz samcib sam gvanj daih’it， mbouj ndaej baecinj gvaq、 mbouj aeundaej roxnaeuz mbouj ciuq gvidingh yungh gij maihauh cienmonz yungh， roxnaeuz mbouj dawzmiz、 mbouj bengxgya gij fubwnj mbawcingq cinjhawj vunzguh sanjfat、 faenh faenzgienh baecinj roxnaeuz aen maihauh cienmonz yungh, couh gaiok、 cawxaeu、 leihyungh、 daehyinh、 raekdawz、 fakgeiq gij duzdoengh guekgya cungdenj baujhoh nem gij doxgaiq duzdoengh cauhbaenz, roxnaeuz gij duzdoengh nem gij doxgaiq duzdoengh cauhbaenz aen fap neix diuz ngeihcib bet gvanj daihngeih gvidingh ne， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj roxnaeuz aen bouhmonz guenjleix gamduk hawciengz, ciuq faenhhong faenhong muedsou duzdoengh lienzdaengz gij doxgaiq duzdoengh cauhbaenz caeuq gij famhfap aeundaej， caemhcaiq fadcienz dangq gij gyaqcienz duzdoengh nem gij doxgaiq duzdoengh cauhbaenz song boix doxhwnj cib boix doxroengz；guh loeng youqgaenj ne， diuqsiu mbawcingq cinjhawj vunzguh sanjfat、 siubae gij faenzgienh baecinj、 soudauq aen maihauh cienmonz yungh； danghnaeuz gapbaenz famhcoih， ciuqfap gyaepcaz hingzsaeh cwzyin.
Famh gij gvidingh aen fap neix diuz ngeihcib caet gvanj daihseiq、 diuz samcib sam gvanj daihngeih， mbouj dawzmiz gij cwngmingz laizloh habfap couh gaiok、 leihyungh、 daehyinh gij duzdoengh mbouj dwg guekgya cungdenj baujhoh， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj roxnaeuz aen bouhmonz guenjleix gamduk hawciengz ciuq faenhhong faenhong muedsou duzdoengh， caemhcaiq fadcienz dangq gij gyaqcienz duzdoengh boix ndeu doxhwnj haj boix doxroengz.
Famh gij gvidingh aen fap neix diuz ngeihcib caet gvanj daihhaj、 diuz samcib sam， gaiok、 daehyinh、 raekdawz、 fakgeiq gij duzdoengh nem gij doxgaiq duzdoengh cauhbaenz nangqdaengz mbouj dawzmiz roxnaeuz mbouj bengxgya mbawcingq cazniemh binghlah ne， ciuq gij gvidingh 《Aen Fap Fuengz Binghraq Doihduz Cunghvaz Yinzminz Gunghozgoz》 guh cawqfad.
Diuz seiqcib gouj Famh gij gvidingh aen fap neix diuz samcib， swnghcanj、 haiguh gaicawx gij duzdoengh guekgya cungdenj baujhoh nem gij doxgaiq duzdoengh cauhbaenz, roxnaeuz gij duzdoengh mbouj dwg guekgya cungdenj baujhoh nem gij doxgaiq duzdoengh cauhbaenz mbouj miz cwngmingz laizloh habfap, roxnaeuz vih gwn yungh cix mbouj habfap cawxaeu gij duzdoengh guekgya cungdenj baujhoh nem gij doxgaiq duzdoengh cauhbaenz ne， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj roxnaeuz aen bouhmonz guenjleix gamduk hawciengz, ciuq faenhhong faenhong roengzlingh dingzguh gij saeh famhfap， muedsou duzdoengh nem gij doxgaiq duzdoengh cauhbaenz lienzdaengz gij famhfap aeundaej， caemhcaiq fadcienz dangq gij gyaqcienz duzdoengh nem gij doxgaiq duzdoengh cauhbaenz song boix doxhwnj cib boix doxroengz； danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz hajcib Famh gij gvidingh aen fap neix diuz samcib it， vih gai、 cawx、 yungh duzdoengh nem gij doxgaiq duzdoengh cauhbaenz, roxnaeuz vih gij gaiqdawz dwknyaen deng gimq bae fat gvangjgau ne， ciuq gij gvidingh 《Aen Fap Gvangjgau Cunghvaz Yinzminz Gunghozgoz》guh cawqfad.
Diuz hajcib it Famh gij gvidingh aen fap neix diuz samcib ngeih， vih famhfap gai、 cawx、 yungh duzdoengh nem gij doxgaiq duzdoengh cauhbaenz, roxnaeuz vih gij gaiqdawz dwknyaen deng gimq hawj guh gaicawx， youz aen bouhmonz guenjleix gamduk hawciengz ndaw yinzminz cwngfuj yienh gaep doxhwnj roengzlingh dingzguh gij saeh famhfap， hanhseiz gaijcingq， muedsou gij famhfap aeundaej， caemhcaiq fadcienz dangq gij famhfap aeundaej song boix doxhwnj haj boix doxroengz；danghnaeuz mbouj miz famhfap aeundaej， fadcienz fanh maenz doxhwnj haj fanh maenz doxroengz； danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz hajcib ngeih Famh gij gvidingh aen fap neix diuz samcib haj， dawz duzdoengh roxnaeuz gij doxgaiq duzdoengh cauhbaenz haeujok gyaiqguek， youz haijgvanh、 gungh’anh gihgvanh、 aen bouhmonz gwnz haij caepfap, ciuq faplwd、 hingzcwng fapgvi caeuq gij guekgya gvidingh nangqdaengz guh cawqfad；danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz hajcib sam Famh gij gvidingh aen fap neix diuz samcib caet gvanj daih’it， daj rog gyaiqguek yinxhaeuj gij cungjniuh duzdoengh， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj, muedsou gij duzdoengh yinxhaeuj， caemhcaiq fadcienz haj fanh maenz doxhwnj ngeihcib haj fanh maenz doxroengz；mbouj ciuqfap bae cazniemh binghlah haeuj gyaiqguek ne， ciuq gij gvidingh《Aen Fap Cazniemh Binghlah Doenghduz Doenghgo Haeujok Gyaiqguek Cunghvaz Yinzminz Gunghozgoz》 guh cawqfad；danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz hajcib seiq Famh gij gvidingh aen fap neix diuz samcib caet gvanj daihngeih， dawz gij duzdoengh daj rog gyaiqguek yinxhaeuj cuengq haeuj bobaq bae， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj roengzlingh hanhseiz gaeb dauq， fadcienz fanh maenz doxhwnj haj fanh maenz doxroengz；mauhseiz mbouj gaeb dauq ne， youz aen bouhmonz mizgven cawjguenj baujhoh duzdoengh bang gaeb dauq roxnaeuz yungh gij banhfap gemjnoix yingjyangj， gij cienz bang gaep dauq aeuyungh youz boux deng roengzlingh hanhseiz gaeb haenx ok.
Diuz hajcib haj Famh gij gvidingh aen fap neix diuz samcib gouj gvanj daih’it， gyajcauh、 bienqcauh、 gaicawx、 cienjnyiengh、 cociq mbawcingq、 gij maihauh cienmonz yunghdaengz roxnaeuz gij faenzgienh baecinj aeuyungh， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj, muedsou mbawcingq、 gij maihauh cienmonz yungh、 gij faenzgienh baecinj nangqsaeh famhfap caeuq gij famhfap aeundaej， caemhcaiq fadcienz haj fanh maenz doxhwnj ngeihcib haj fanh maenz doxroengz；danghnaeuz gapbaenz gij saeh famh cianh guenjleix， youz gungh’anh gihgvanh ciuqfap guh cianh guenjleix cawqfad；danghnaeuz gapbaenz famhcoih， ciuqfap gyaepcaz hingzsaeh cwzyin.
Diuz hajcib roek Gij saedhuq ciuq aen fap neix gvidingh muedsou ndaej， youz aen bouhmonz cawjguenj baujhoh duzdoengh ndaw yinzminz cwngfuj yienh gaep doxhwnj roxnaeuz aen danhvei ndaej de hawjgienz ciuq gvidingh cawqleix.
Diuz hajcib caet Gij biucinj caeuq fuengfap bingzguj gyaqcienz doxgaiq dwknyaen ndaej、 gij gyaqcienz duzdoengh nem gij doxgaiq duzdoengh cauhbaenz aen fap neix gvidingh， youz aen bouhmonz cawjguenj baujhoh duzdoengh ndaw Gozvuyen daeuj dingh.
Cieng Daihhaj Bengxgya
Diuz hajcib bet Aen fap neix daj 2017 nienz 1 nyied 1 hauh hwnj saedhengz.
由中國民族語文翻譯局提供
